Archives quotidiennes: 18 décembre 2020
Ady amin’ny fanaovana maloto an-kalamanjana : ny fanorenana foto-drafitr’asa no vahaolana
Isan’ireo firenena manana taha ambony eo amin’ny fanaovana maloto an-kalamanjana I Madagasikara hoy ny firaisamonim-pirenena misehatra amin’ny fidiovana sy fanadiovana. Tokony hafainganina ny fanorenana foto-drafitr’asa mifanaraka amin’izany hoy izy ireo ary aorian’izay, hampiharana ny lalàna ireo rehetra tratra manao izany.
Fanombanana ny politikam-panjakana : antoka hahatratrarana ny vina napetraka
Tsy mbola tafiditra tao anatin’ny kolontsain’ny Malagasy ny fanombanana ny politikam-panjakana na ny évaluation des politiques publiques. Antoka iray ahatratrana ny vina napetraka anefa izany raha ny fanazavana.
Fitantanana ny valan-java-boahary : esorina ny tompon’andraikitra tsy mahomby
Tsy maintsy havaozina hifanaraka amin’ny tanjon’ny fampandrosoana maharitra ny fitantanana ny valanjavaboahary eto Madagasikara. Hapetraka mazava ny bokin’andraikitra hifehezana ny fitantanana. Isany hojerena manokana ny tamberim-bidy azo avy amin’ny valan-java-boahary izay mety hiafara amin’ny fanesorana ny tomponandraikitra tsy mahomby aorian’ny fanaovana tombana.
Fomba fiasan’ny Solombavambahoaka : mampametra-panontaniana ny maro
Tsy ampy ny fetr’isan’ireo Solombavambahoaka tonga teny anivon’ny Antenimierampirenena androany handray ny fanapahan-kevitra ny mahakasika ireo antontan-taratasy miisa 12, izay maha voasaringotra olona ambony teto amin’ny firenena, ho nanao kolikoly sy fanodikodinambolam-panjakana. Ankilany, efa tontosa ny asan’ny kaomisionina manokana raha ny nambran’ny filohany fa anjaran’ny fivoriambe azo atrehina sisa.
Famatsiam-bola ny tetezana – Mangoky : nankatoavin’ny loholona
Miroso ny dingana fanamboarana ny tetezana lava indrindra eto Madagasikara, mirefy 880m, izay haorina eo amin’ny Reniranon’i Mangoky. Lany androany teo anivon’ny antenimierandoholona ny volavolan-dalàna fankatoavana ny fampidiram-bola ny tetikasa ity. Ny taona ho avy arak’izany no hivoaka ny tolo-bidy ho an’ny orinasa izay handray ny asa.
Faritra Atsimo : 100 tapitrisa dolara ny vola azo hiadina amin’ny kere
Tontosa androany teny amin’ny lapam-panjakan’Iavoloha ny fifanaovan-tsonia ny fandaharahan’asa "Mionjo" hiadiana amin'ny tsy fanjarian-tsakafo any atsimo hiarahana fanjakana Malagasy sy ny Banky Iraisam-pirenena. Vola nitentina 100 tapitrisa dolara no natolotry ny Banky Iraisam-pirenena tamin’izany.