Archives quotidiennes: 30 avril 2021

Tokony halamina dieny izao ny fandrindra ny fandaminana rehetra amin’ny fanatanterahana ny vaksiny eto amintsika raha ny fanehoan-kevitr’ireo mpiaro ny zon’olombelona. Tsy tokony hisy ny fanavahana’olona amin’ny fanaovana izany ary tokony hivelatra amin’nhy sehatra tsy miankina ihany koa ny mpitondra fanjakana amin’ny fanafarana io vaksiny io.

Voahitsakitsaka amin’ny endriny maro samihafa amin’izao fotoana izao ny lalàm-panorenantsika eto Madagasikara hoy ny teo anivon’ny RMDM androany. Tsy azo ekena hoy izy ireo ny zava-misy ankehitriny ka tsy maintsy hiroso amin’ny hetsika maro samihafa izy ireo.

Hampitarazoka ny fisitrahan’ny vahoaka malagasy ny vaksiny ny fandraran’ny fanjakana ny fanafarana ataon’ny sehatra samihafa, hoy ny filohan’ny Antenimierandoholona teo aloha Rivo RAKOTOVAO. Tsy tokony ionona fotsiny amin’ny INITIATIVE COVAX ihany koa ny fanjakana fa hanetsika ny lalana rehetra mety ahazoana ny vaksiny anatin’ny mangarahara. Ny hanavotana ain’olona maro no tanjona raha ny fanazavana.

Hanomboka amin’ity herinandro ity ny fandrakofana tara na goudron amin’ny lalana eo Mahamasina, Ankadilalana mankany Tsimbazaza. Ny volana Mai ho avy izao no voalaza ho fahavitan’ny asa tanteraka. Etsy ankilany, niantso ny tomponandraikitra sy ny mponina ary ny mpivarotra ny eo anivon’ny minisiteran’ny fanajariana ny tany sy ny asa vaventy hanaja ny fotodrafitrasa ary tsy hanakana ny fizotry ny asa, tahaky ny amin’ny alalan’ny famarotana ambonina trottoir.

Noho ny fiankinan-doha be loatra amin’ny fanjakana, ary tsy nahitana vokatra araka ny tokony ho izy no nanafoanana ny IGM na ny « Institut de Gemmologie de Madagascar ». Ny taona 2014 hatramin’izao, mihoatry 2 876 Tapitrisa Ariary ny fanampiana nalefan’ny Fanjakana ho an’ny IGM ary tsy misy hafa-tsy 175 ireo mpianatra tao aminy nanomboka ny taona 2004.

Voafidy ho filohan’ny vaovaon’ny fitsarana avo momba ny lalam-panorenana na ny HCC androany i Florent RAKOTOARISOA. Isam-bato 8 amin’ny 8 no azon’ny nandritra ny fifidianana notanterahina tamin’ny alalan’ny visio conférence ny maraina teo.