Archives quotidiennes: 25 novembre 2021
Maroalompotsy -Taolagnaro : olona 4 no sarona saika hivarotra zaza varira mianadahy
Olona 04 no saron’ny Zandarimariam-pirenena ao Taolagnaro nikasa haka an-keriny zaza varira miisa 02 tao amin’ny Kaominina Maroalompotsy. Taorian’ny famotorana natao, natolotra ny fampanoavana ao Taolagnaro ny raharaha.
Simenitra amin’ny vidiny ara-drariny : ho tonga ny volana janoary 2022 izao ny andiany manaraka
Tsy maharaka ny tinady ny tolotra amin’ilay simenitra nafaran’ny fanjakana, amidy amin’ny vidiny ara-drariny ankehitriny. Lany avy hatrany avokoa ireo izay tonga na eny amin’ny mpamongady, na eny amin’ny mpaninjara. Nanambara ankilany ny SPM na ny State Procurement Of Madagascar, miandraikitra ny fanafarana fa ny fiandoahan’ny volana janoary 2022 no vinavinaina ho tonga eto amin’ny Nosy ny simenitra andiany manaraka.
Fandaniana ny LFI 2022 : nafana ny adihevitra momba ny fampiakarana ny haba amin’ny bondillons
Niompana manodidina ny fanitsiana ny fepetra ara-ketra ny adihevitra teny anivon’ny Antenimierampirenena nandritra ny fandaniana ny LFI 2022 omaly. Lohalarahana ny fampiakarana ho 20 % ny haba alaina amin’ny bolabolan-tsavony. Fanavaozana izay atahoran’ny solombavambahoaka hampiakatra ny vidiny eny antsena.
JIRAMA : handatsaka orana artifisialy mandritry ny 4 andro
Handatsaka orana artifisialy mandritry ny 04 andro eto Antananarivo sy ny manodidina ny orinasa JIRAMA ho famahana ny olan’ny fahatapahan-jiro sy ny rano fisotro madio noho ny haintany ateraky ny fiovan’ny toetr’andro. Efa feno ny fepetra takiana amin’ny hamandoana sy ny maripana ary ny rivotra, ka natomboka androany ny fandrarahana sira eny amin’ny habakabaka.
CNRIT : Court-circuit no nitarika ny firehetana tamin’ny 3 ora sy sasany maraina teo
Trano famakiam-boky iray, laboratoara 2, birao 3, ary trano fitehirizana 5 no potiky ny afo izay nanomboka tamin’ny 3 ora sy sasany maraina teo teny amin’ny CNRIT na ny Centre National de Recherches Industrielle et Technologique etsy Tsimbazaza. Court-circuit tamina efitra iray no voalaza fa niandohan'ny afo ary niitatra tamin'ny efitra hafa. Nambaran’ny talen’ity toeram-pikarohana ity fa tsy misy idiran’ny resaka fitantanam-bola eo amin’ny centre izao firehetana izao.
Fanondranana volamena : angalana «droit d’accise» 15 % manomboka izao
Nanohitra ny fampiharana ny hetra tsy mivantana alaina amin’ny fanondranana volamena ny kaomisiona misahana ny harena an-bikon’ny tany sy ny loharanon-karena stratejika eny anivon’ny Antenimierampirenena. Hamotika ny sehatra ary hampahazo vahana ny fanondranana an-tsokosoko ny fampiharana ny Droit d’accise, hoy ny fanazavana.