Archives mensuelles: février 2020

Miteraka fiovan’ny vidin'etana eny an-tsena ny fiovan'ny toetr’andro. Misy Araka izany ny tetikasa hapetraka ho fanatsarana ny fiahina ara-tsakafo eto Antananarivo renivohitra. Tsy ny vahaolana maika no ilaina, fa ny vahaolana maharitra hoy ny ben'ny tanànan’Antananarivo renivohitra.

Manoloana ny feo miely mahakasika ny mety ho fanendrena governora any amin’ny faritr’i bongolava, mangataka ireo fikambanan’ny ben’ny tanàna any amin’ity faritra ity mba ho olona mahalala tsara an’i Bongolava sy ny mponina ao aminy no hotendrena eo amin’izany toerana izany. Olona mahalala ny faritra no afaka mampandroso azy araka ny tanjona napetraka.

« Compteur Jirama » maro no lasan’ny mpisoloky eny amin’ny fokontany Nanisana, ka tokantrano maro no tsy misitraka jiro vokatr’izay. Fisandohana andraikitra sy fisolokiana izany hoy ny tomponandraikitra eo anivon’ny orinasa Jirama.

Mifamaofao ny toe-draharaha momba ilay resaka hala-jaza nitranga omaly teny Ansoibe Andrefana I. Raha ny fanadihadiana nataon’ny mpanao gazety androany, misy ny milaza fa toerana handevenana ilay zazakely no nampiady ireo ray aman-dreniny ka ilay raim-pianakaviana no nitondra ilay zaza nitsoaka.

Manoloana ny fampiantsoana an’andriamatoa Ny Rado RAFALIMANANA teo anatrehan’ny fampanoavana androany maraina, nanambara ny mpisolovava azy fa efa nilamina teo anivon’ny pole anti corruption ny raharaha, fa fanarahana ny paik’ady ara-pitsarana fotsiny ny fahatongavana teny amin’ny tribonaly anosy androany.

Tetikasa goavana 2 hanamarika ny 5 taona voalohany hitondran’ny filoha Andry Rajoelina ny fanarenana ny Rovan’Antananarivo sy ny fanamboarana ny kianja Barea etsy Mahamasina. Taorian’ny fitsidihana ny Rova , nitsidika ny fizotry ny asa etsy Mahamasina ihany koa ny filoha. Ity farany izay nanamafy fa ho vita mialohan’ny 26 Jona izany.

Nivoaka tamin’ny fahanginany ny mpisolo vava sisa velona nandritry ny fitsarana ny raharaha Ratsimandrava tamin’ny 1975, namboraka ny mampiavaka ity raharaham-pitsarana ity. Tamin’izany indrindra no nanambarany fa tsy mangarahara intsony, ary tsy manome fahafaham-po ny vahoaka hahafantatra ny tena marina ny fitsarana ankehitriny, raha oharina amin’ny teo aloha.

Manoloana ny tsy fahombiazan’ny fiaraha-miasan’i Air Madagascar sy Air Austral, paikady hafa indray no fantatra amin’izao fa hapetraky ny fanjakana. Na mbola tsy nahazoana fanambarana ofisialy aza sy mbola tsy nandalo teo anivon’ny filankevi-pitantanan’ny Air Madagascar aza, fantatra fa manana fikasana hampiasa vola ao amin’ny Air Madagascar ny orinasa CNAPS .

Miha-mahazo vahana indray ny fanelezana vaovao tsy marina sy fifampiantsiana tao anatin’ny tambazotran-tserasera tato ho ato. 15 hatreto ny fitoriana voarain’ny sampandraharaha miady amin’izy ireny, ary maro ireo olona karohina.

Fomba iray hahafahana miala amin’ny findramam-bola amin’ny mpamatsy vola ny fametrahana ny “fonds souverain” ary hahazoana tombony ara-toekarena ao anatin’ny fotoana fohy. Izay raha ny nambaran’ny avy eo anivon’ny CREM androany manoloana ny fikasan’ny fanjakana Malagasy hametraka izany hanatanterahana ireo tetikasam-panjakana maro.