Archives annuelles: 2023

Azo sokajiana ho 3 lehibe ny asa miandry ny governoran’ny Banky Foiben’i Madagasikara vaovao hoy ny mpahay toekarena nanaovana fanadihadiana androany. Isan’ireny ny fijerena manokana ny fahamarinan-toeran’ny vidin-javatra fa ihany koa ny fampiroboroboana ny lafiny toekarena amin’ny maha tany andalam-pandrosoana an’i Madagasikara.

Tokony hanolotra vahaolana ho an’ireo tantsaha mpamokatra ny mpitondra fanjakana amin’izao fotoan’ny maitso ahitra izao, hoy ny mpiaro ny zon’ny mpanjifa. Ireo tantsaha izay lasa mividy lafo ny vokatra novokariny noho ny fisian’ireo mpijirika sy mpaka tombony tsy voaara-maso, indrindra eo amin’ny vidim-bary.

Niverina nahazo vahana indray rehefa niato tato ho ato ny famakiana ireo fiarakodia sy koadiaran-droa. Maro amin’ireo olon-dratsy manao manokana izay ankehitriny no mampiasa karazana fanalahidy mety amin’ny rehetra na « Clé Standard » ka mora amin’izy ireo ny fandrobana ny fiara raha ny fanadihadiana.

Mitaky ny hamerenana ny Vola novatsiany teo anelanelan’ny taona 2014 hatramin’ny 2019 ny tahirim-bola ny firenena mikambana ho an’ny zaza na ny UNICEF raha ny tatitry ny filan-kevitry ny minisitra omaly. Ankilany, nilaza ny manam-pahaizana momba ny fifandraisana iraisam-pirenna fa tsy mandeha amin’ny tokony ho izy ireo rafitra mpanara-maso ka antony fitakiana famerenam-bola ataon’ireo mpiara-miombon’antoka sy mpamatsy vola ankehitriny.

Tsy mampiova ny hevitra amin’izay mety ho safidy amin’ny fifidianana ho avy ny fizarana sy fandraisana ireo akanjo fampielezan-kevitra samihafa raha ny fanehoan-kevitr’ireo olon-tsotra sendra ny mpanao gazety androany. Maro amin’ireo olom-pirenena, indrindra ny any amin’ny tontolo ambanivohitra no mampiasa ireo akanjo fampielezan-kevitra ireo amin’ny andavanadro ary tsy liana amin’ny resaka politika amin’ny ankapobeny.

Tsy mbola misitraka ny taberimbidy tokony ho sitrahan’izy ireo amin’ny alalan’ny orinasa Ambatovy ireo kaominina 21 ao amin’ny faritra Atsinanana sy Alaotra Mangoro voakasiky ny tetikasa raha ny nambaran’ireo ben’ny tanàna. Misedra fahasahiranana ankehitriny ireo kaominina taorian’ny fampihatoana ny fandoavana ny taberimbidy izay nataon’ny minisisteran’ny toekarena sy ny fitantanam-bola ny taona 2020, na eo aza ny fanohizan’ny tetikasa Ambatovy ny fandrotsahana ny tamberimbidy anatin’ny kitapobolam-panjakana ankehitriny.

Niverina any Antanimora androany indray i Mahery Lanto Manandafy, rehefa nivoaka ny faha- 31 desambra 2022 teo ny didy fampisamborana azy, mahakasika ny raharaha Benessy izay namoahana didim-pitsarana migadra heritaona an-tranomaizina any Ambalatavoahangy Toamasina.

Mihamafy ny fahapotehan’ny lalam-pirenena saika manerana ny Nosy amin’izao fotoana. Isany nanaovan’ny mpitatitra teo anivon’ny Gare Maki fanairana manokana ny lalampirenena faha-2, faha-4 sy faha-6. Ny faharatsian-dalana izay tsy maintsy ho tonga amin’ny fahatapahana tanteraka raha tsy misy ny fanamboarana indrindra amin’izao vanim-potoan’ny rotsak’orana izao.

Nametra-pialana ankehitriny ny Governoran’ny Banky Foiben’i Madagasikara RABARIJOHN Henri. Ny olana ara-pahasalamana no voalaza ho anton’ny fametraham-pialany raha ny loharanom-baovao teo anivon’ny Banky Foiben’ny Madagasikara androany. Andrasana anatin’ny filankevitry ny minisitra anio kosa ny fanampahan-kevitra horaisin’ny fitondram-panjakana manoloana izany.