Archives mensuelles: février 2020

Ny fanendrena ireo governoram-paritra miisa 11 ho an’ireo faritra izay tsy mbola manana izay no andrasan’ny mpanara-baovao amin’izao fotoana izao taorian’ny fanendrena ny mpikambana teo anivon’ny governemanta. Ny governora izay tokony hanakaiky ny vahoka raha ny nambaran’ireo solombavambahoaka.

Mitohy hatrany ny ady atao amin’ny olan’ny aditany. Titre foncier miisa 500 indray no nozaraina tao amin’ny kaominina Mananjara ao anatin’ny distrikan’Ambohidratrimo androany. Fizarana titre sy karatany faobe izay hitohy manerana ny Nosy.

Feno 45 taona anio no nanolorana ny fahefana feno hitondra ny tany sy ny fanjakana an’i kolonely RATSIMANDRAVA Richard. Izy izay nanam-pahavalo teto amin’ny firenena raha ny nambaran’ireo mpahay tantara noho ireo asa vitany nandritra ny fitondrana. Tsy fantatra mazava hatrato ny tena nahafaty azy.

Ho mafy ny sazy ho an’ireo tsy manara-dalàna hoy ny ben’ny tanànan’Antananarivo renivohitra, indrindra ho an’ireo fiara. Naato ihany koa ny fanomezan-dalana ho an’ny fanotofan-tany ary haverina ho jerena na mifanaraka amin’ny lalàna na tsia ireo izay nahazo alàlana taloha.

Miisa 150 ireo fitoriana voarain’ny filankevi-panjakana hatramin’ny androany mangataka fandravana ny didy navoakan’ny fitsarana misahana ny ady amin’ny fanjakana tamin’ny fifidianana Ben’ny tanàna farany teo raha ny nambaran’ny commissaire Général de la Loi etsy Anosy.

Nihaona tamin’ireo mpanolontsainan’ny kaominina Antananarivo androany ny benin’ny tanàna vaovao nitondra fanazavana mikasika ny teti-bolan’ny kaominina amin’ity taona 2020 ity. Teboka maromaro no nohamafisiny nandritra izany toy ny fampandrosoana ny lafin’ny fahasalamana, sy ny fampianarana ho an’ny mponina eto an-drenivohitra ao anatin’ity teti-bola ity.

Tanana efatra no hisitraka herinaratra azo avy amin’ny masoandro 100% tafiditra ao anatin’ny fanatsarana ny famokarana herinaratra eto Madagasikara. Ny vondrona « LIDERA » miorina atsy Maorisy no hiara-hiasa amin’ny JIRAMA ao anatin’izany izay tafiditra amin’ny vinan’ny filoham-pirenena.

Manoloana ny fampitam-baovao navoaky ny Ministeran’ny fiompiana sy ny fambolena ary ny Jono ny volana Janoary lasa teo, namoaka fanambarana ny eo anivon’ny Collectif Tany sy ny CRAAD-OI naneho ny ahiahin’izy ireo. Isan’ny teboka mampiahiahy azy ireo ny resaka tany sy ny fiainan’ireo mponina voakasik’izany.

Tojo fahasahiranana ny SAMVA amin’ny toerana hasiana ny dabam-pako eto Antananariso renivohitra. Antony, misy fotodrafitr’asa avokoa ny toerana fametrahana azy ireny. Raha 400 no isan’ny dabam-pako izay samy nanana ny toerany tany aloha, tsy misy hafa-tsy 272 sisa amin’izao fotoana.

Taorian’ny tolokevitra nomen’ny filohan’ny fitsarana avo momban’ny lalam-panorenana amin’ny tokony irosoan’I Madagasikara amin’ny fifidianana isaky ny faritra,nanambara ny filohan’ny CENI fa miankina amin’ny fanapakevitry ny governemanta ny fanantanterahana izany hatreto. Ankoatry ny fanapakevitry ny governemanta, miankina ihany koa amin’ny fisian’ny lalàna mifehy ny fifidianana mazava.