Archives mensuelles: août 2020

Taorian’ny korontana sy savorovoro nisy teto Antananarivo, natsahatra ao anatin’ny 05 andro manaraka ny fizarana ny Sosialim-bahoaka hahafahana mametraka ny fandaminana vaovao noraisina teo anivon’ny filan-kevitry ny minisitra. Havaozina ary hampidirina ao anaty « Base de donnée » ny anaran’ireo izay tokony hisitraka izany ary tsy hisy intsony ny filaharana eny anivon’ny fokontany. 

Mponina ao Toamasina miisa 2 arivo sy efatra alina no nisitraka ny  fanindroany ny Tosika fameno tamin’ity androany ity. Ireo izay tena marefo no nahazo izany araka ny fandaminana avy eo anivon’ny FID sy ny kaomity loharano isam-pokontany

Manoloana ireo Korontana eny anivon’ny Fiarahamonina, omaly sy androany, nitondra fanazavana mahakasika ny Sosialim-bahoaka ny eo anivon’ny kaominina Antananarivo renivohitra. Hisitraka fanampiana avokoa ny tokantrano 2 hetsy ankoat’ireo efa nisitraka ny Tosika Fameno, saingy tsy ho vita ao anatin’ny andro 1 na 2 ny fizarana izany. 

Tao anatin’ny fihibohana, nitombo ny isan’ireo olona nanao fizahana maso eny amin’ny « Ophtalmologie »  na ireo dokotera mpitsabo maso raha ny fanazavan’ireo mpitsabo nanaovana fanadihadiana androany. Ny ankizy sy ny tanora no  maro amin’ireo manao fitiliana raha ny fanazavany hatrany. 

Nanomboka androany ny fanamboarana ny lalana eo amin’ny sampanana Ambohitrimanjaka, eo anoloan’ny  tsena « Art Malagasy ». Mandritry izao fihibohana izao ny hanatontosaina ny asa raha ny fanazavana. Tanjona ny hanatsarana ny lalana mba ahafahan’ireo mpivarotra misintona mpanjifa maro.

Ankoatry ny teny Bemasoandro Itaosy, toerana maro teto Antananarivo renivohitra sy ny manodidina no nandrenesana fitarainana manoloana ny fitsinjarana ny Sosiallim-bahoaka avy amin’ny fitondram-panjakana. Isan’ny nahitana fihetsiketsehana ny maraina teo ny teny amin’ny Fokontany Marobiby Kaominina Fiombonana. 

Nihaona tamin’ireo vahoaka tsy nisitraka ny fanampiana avy amin’ny fitondram-panjakana ny maraina teo teny Bemasoandry Itaosy ny filohampirenena mivady. Fotoana izay nilazany fa tsy maintsy mahazo fanampiana avokoa ny isan-tokantrano eto Antananarivo, ary androany no fanombohana ho an’ny distrikan’Atsimondrano.

Sasa-miandry ny fanapahan-kevitra horaisin’ny fitondram-panjakana ho an’ireo kilasy anelanelany ny ray aman-drenin’ny mpianatra amin’izao fotoana izao manoloana ny fahatapahan’ny fampianarana efa naharitra volana maromaro.  Ankilany nanapa-kevitra ny hamarana ny taom-pianarana 2019 sy 2020 amin’ny faha 14 Aogositra izao ny eo anivon’ny sekoly katolika eto Madagasikara araka ny fanapahan-kevitra noraisin’ny DINEC.

Efa miroso amin’ny fanaraha-maso sy fanarenana  ireo fefiloha hiatrehana ny vanim-potoan’ny fahavaratra ny eo anivon’ny APIPA ankehitriny. Androany ny fefiloha teo Andranoabo no nasiam-panarenana. Mitohy ihany ankilany ireo asa fanadiovana lakan’drano  izay andraikitry ny APIPA na eo aza ady atao amin’ny valan’aretina covid-19.

Nanomboka ihany koa ny fizarana sosialim-bahoaka ho an’ny boriboritany faha-6. Fianakaviana 1 200 avy amin’ny Fokontany 3 teny an-toerana no nahazo fanampiana androany. 28 000 ny fianakaviana hisitraka izay ho an’ny boriboritany faha-6. Hitohy isan’andro arak’izany ny fizarana hoy ny solombavambahoaka.