Archives mensuelles: janvier 2022

Raha ny antotanisa navokan’ny teo anivon’ny BNGRC , mitotaly 39 ankehitriny ireo maty raha toa ka 101 461 ireo traboina manerana ny Nosy tao aorian’ny fandalovan’ny andro Ratsy . Miisa 7 652 kosa ireo toeram-ponenena dibo-drano raha toa ka 58 ireo fantatra fa simba raha ny tatitra nivoaka androany atoandro. 

Hahazo fanampiana avokoa ireo traboina rehetra  ao amin’ny distrikan’Atsimondrano hoy ny Filoham-pirenena nandritra ny fidinany tao amin’ity distrika ity. Hafainganina ihany koa ny fanaovana ny karam-pokontany vaovao amin’ireo kaominina manodidina an’Antananarivo toa ny ao Tanjombato ahafahan’ny vahoaka misitraka fanampiana.  

Very olo-manga ny tontolon’ny fiarovana, nodimandry teo amin'ny faha-76 taonany i Maître RAZAFINJATOVO Willy, fantatry ny maro amin'ny hoe Maître Olala. Raha ny angom-baovao, androany tokony ho tamin'ny 3 ora tolakandro no nindaosin'ny fahafatesana raha notsaboina teny amin'ny hopitaly manarapenitra Andohatapenaka ny tenany.

Olona maherin’ny 1 120 no voatery novonjen’ny mpitandro filaminana tany an-tokantranony alina noho ny fiakaran’ny rano tao amin’ny distrikan’Antsimondrano ka isan’ny maro tamin’izany ny tao amin’ny fokontany Ankeniheny.

Mbola maro ireo mponina nisafidy hijanona amin’ireo faritra atahorana hihotsahan’ny vato sy tany eny Ambanin’Ampamarinana sy ny manodidina, na teo aza ny fanentanana nataon’ny BNGRC sy ny mpitandro filaminana ary ny eo anivon’ny Fokontany. Efa misy anefa ny toerana natokana ho azy ireo raha ny fanazavana ary tokony hiala avokoa hisorohana ny famoizana ain’olona.

Mitaraina ireo traboina raisina etsy amin’ny kianja Barea Mahamasina noho ny fahataran’ny sakafo omena azy ireo. Tsara ny toerana andraisana saingy ny fandaminana no tsy araka ny tokony ho izy raha ny fanazavana. Ny fisian’ireo mpanararaotra no isan’ny antony hoy ny tomponandraikitra.

Tsy mitsahatra miakatra ny reniranon’ny Ikopa, Sisaony ary i Mamba amin’izao, mbola mitazona hatrany ny loza mitatao na loko mena amin’ireo renirano  ireo raha ny tatitra avy amin’ny APIPA hatramin’ny hariva teo. Efa nanomboka omaly no nirosoana ny fanesorana vonjy maika ireo olona  amin’ny toeram-ponenana dibo-drano ka misy  ireo tsy mety miala amin’ny trano noho ny tsy fandriam-pahalemana.

8 ny fantatra fa tototry ny tany nandritra ny fiotsahana Parking iray tetsy Ankadifotsy androany maraina. Hatramin’ny fotoana nanaovana ny fanadihadiana tamin’ny 2 ora atoandro, 5 ny razana voasikotry ny sampana mpamonjy voina. Mitohy arak’izany ny fikarohana ny ambiny, izay anaty fahasarotana tanteraka noho ny fahavesaran’ny ranotany sy ny vato nianjera tamin’ireo trano tra-doza.

Vaky ny hariva teo ny fefiloha manelanelana ny Kaominina Soavina sy Ampitatafika, isan’ny nahatonga ny fahavakisana ny tsy fitovian’ny hamafin’ny fefiloha raha ny fanadihadiana natao.

Tsy marina ny filazana ny amin’ny fahavakisan’ny toha-dranon’Ampirihika ao amin’ny kaominina Ambotrimanjaka halina raha ny nambaran’ny Ben’ny tanàna  teny an-toerana androany.  Niverina ny fahasimban’ny  vavan’ny barazy  manondraka ny tanimbary ao Ampirihika, nisy manoloana izany ny fifanomezan-tanana teo amin’ireo fokonolona sy ny tomponandfraikitra ho fanamafisana ny toho-drano manakana ny reniranon’i Sisaony tsy handifitra ireo tanim-bary sy ireo tanàna manodidina.