Archives quotidiennes: 16 janvier 2020

Niroso tamin’ny fanesorana ireo mpivarotra eny amoron-dalana ny eto Antananarivo renivohitra. Androany, ny teny Anosy mihazo an’Andrefan’Ambohijanahary no natao. Tsy nijanona teo amin’ny fanesorana, nisy ihany koa ny fampianarana sy ny fitaizana ny mpandeha an-tongotra sy ireo mpitondra fiara.

Tokony harahina ny didy navoaky ny HCC hoy ny filohan’ny Antenimerandoholona raha nitodika fanindroany teny Ambohidahy nanontany momba ilay fanapahan-kevitra navoaka izay nanome fahefana hanao lalàna ny filohan’ny repoblika. Fangatahana izay tsy mitombina hoy ny mpahay lalàna nanaovana fanadihadiana.

Notanterahana androany ny « réception provisoire » ny lalam-pirenena faha-7 miainga eo Anosy mipaka eny Andranomena. Voahaja ny fenitra sy ny kalitao hoy ireo tomponandraiki-panjakana nanatanteraka izany tamin’ity androany ity.

Afaka tanterahina ny famerenana ny fifidianana kaominaly any Faratsiho raha mivoaka ny marina hoy ireo solontenan’ny kandida natolotry ny antoko MMM any an-toerana. Mifanohitra amin’ny voasoratra ao anatin’ny “PV” ny fitoriana izay napetrakin’ny kandida laharana faharoa tany an-toerana, hoy izy ireo.

Notanterahina teny amin’ny lapam-panjakana Iavoloha ny maraina teo ny fiarabahana tratry ny taona ho an’ny Filoham-pirenena nataon’ireo governora 11 narahan'ny mpikambana teo anivon'ny CENI ary ireo mpikambana teo anivon’ny Akademia Malagasy. Firariantsoa maro sosona no natolotr'izy ireo ny filoham-pirenena amin'ny adidy maro samihafa iandreketany.