Archives mensuelles: octobre 2020

Tafapetraka androany teny amin’ny Ovec Nanisana ny taratasy firon-tsahan-kofidian’ny kandida ho loholon’i Madagasikara avy amin’ny Antoko Malagasy Miara- Miainga, ka i RAKOTONDRAINIBE Michel no lohalisitra amin’izany. Laharam-pahamehana ny fametrahana ny fitsinjaram-pahefana tena izy hoy ity kandida ity.

Hafainganina hoy ny filohan’ny Repoblikan’i Madagasikara ny fametrahana ny faritra faha 23 ao Mananjary. Araka izany, ho dinihina ao anaty filankevitry ny minisitra ny alarobia ho avy izao ny volavolan-dalàna mahakasika izany ka hatolotra ny Antenimiera.

Rongony maina 20 gony no nodorana teo anatrehan'ny mpitandro filaminana sy ny teo anivon'ny solontenan'ny fitsarana androany maraina teo anivon'ny Commissariat de Police – Soavina, Distrikan'Atsimondrano. Ireto rongony ireto izay tra-tehaky ny polisim-pirenena Soavina sy ny Andrimasom-pokonolona ny herinandro lasa teo.

Tafapetraka androany ny firotsahan-kofidian'ny lisitra kandidà ho loholon'ny Madagasikara eto amin'ny faritanin'Antananarivo natolotry ny vovonana IRD. Herminana RAZANAMAHEFA no mitarika ny lisitra, kandidà faharoa kosa ny I Sylvain RABETSAROANA, loholona teo aloha.

Tokony samy hampiseho ny fifanajana sy ny fahamatorana avokoa ireo olobe rehetra voakasika amin’ny fifidianana izay ho loholon’i Madagasikara hoy ny teo anivon’ny CFM. Tokony hiseho ihany koa ny fahamatorana ary ny fanajana ny fahamarinana.

Zava-maneno isan’ny mampiavaka an’i Madagasikara ny valiha. Maro ny karazany ary samy manana ny mampiavaka azy ny isam-paritra na misy aza ny iraisany. Karazany iray amin’izany ny valiha marovany, avy any Atsinanan’i Madagasikara izay velomin’ny tarika BERTHON Valiha ankehitriny.

Takiana ny fanana ny diplaoma “ Baccalauréat” ho an’ireo maniry ny hiditra ho mpianatra zandary ankehitriny raha ny nambaran’ny teo anivon’ny zandarimariam-pirenena. Natao izany, ho fanatsarana ny fampianarana eo anivon’ny sekolin’ny zandarimaria. Eo ihany koa ny ahafahana mampiakatra ny fahaizamanaon’ireo mpianatra ho zandary.

Anisan’ireo nitondra tombotsoa sy fampandrosoana ho an’ ireo tantsaha ao amin’ny faritra Vakinankaratra ny fananana ny Eco village indrindra fa eo amin’ny lafiny fambolena sy ny fiompina ary fampianara ireo zaza eny ambanivolo .

Raim-pianakavina iray nisehatra teo amin’ny fanamboarana Objet miniature nandritra 30 taona Avy ao Antsirabe renivohitra no hiaraka amintsika amin’ity anio ity . Araky ny fanadihadina natao, mandalo fotoana-tsarotra ankehitriny mpanao asa Tanana vita Malagasy.

Vehivavy 1 no maty ary miisa 8 ireo naratra mafy, nandritra ny lozam-pivamoivona niseho manoloana ny gare routière Tanambao 5, Toamasina androany. Raha ny fanadihadiana tany an-toerana, fiara nandeha mafy nentina mpamily nisotro toaka no niteraka ity lozam-pivamohivozana ity.