Archives mensuelles: juillet 2021

Lehilahy miisa 6 nikasa ny hifofo ny ain’ny Sekreteram-panjakana miadidy ny Zandariamariam-pirenena no voasambotry ny vondrotobi-pileovan’ny Zandarimariam-pirenena Analamanga sampana misahana ny fikarohana heloka be vava. Ankoatra io, jiolahy miisa 4 izay nikasa hanafika mpandraharaha iray teto Antananarivo ihany koa no tra-tehaky ny mpitandro filaminana.

Tokony ho fitaratra ho an’ny antoko Politika eto Madagasikara ny Parti communiste chinois eo amin’ny fomba fiasa. Ity antoko Kaominista ity izay feno 100 taona ankehitriny ary isan’ny nahatonga ny firenena entim-bahoakan’i Chine ho isan’ny mandraso indrindra maneran-tany.

Anatin’ny fanarenana ny lafiny fanabeazana eto Madagasikara isika izao araka ny nambaran’ny minisitry ny fanabeazam-pirenena androany. Manoloana ny taha navoaky ny Unicef izay maneho ny fihenan’ny fahaizan’ny ankizy Malagasy amin’ny famakiana teny sy manoratra, nambaran’ny minisitra tompon’andraikitra fa mifototra amin’ny fanadihadiana natao ny taona 2018 ny taha nivoaka.

Zary lasa hadino ao amin’ny politikam-pampandrosoana ny firenena ireo olona manana fahasembanana hoy ny Fédération des Personnes Handicapés de Madagascar. Vitsy na tsy misy ny fotodrafitr’asa natokana ho azy ireo.  Maro ihany koa ny lalàna tsy ampiharina izay hanairan’ny FPHM ny fitondram-panjakana.

Tsy maintsy maka fahazoan-dalana amin’ny minisiteran’ny fanajariana ny tany sy ny asa vaventy ny Jirama vao afaka miroso amin’ny fandavahana eny amin’ny lalana eto amin’ny faritra Analamanga, araka ny tapaka tamin’ny alalan’ny fiaraha-miasan’ny roa tonta. Tomponandrakitra feno amin’ny famerenana amin’ny laoniny ireo lavaka nataony ihany ny orinasa Jirama raha ny fanazavana  nandritra ny fandraisana vonjimaika ny lalana namboarina eo Mahamasina, sy Ankadilalana mihazo an’i Tsimbazaza.

Rehefa navoaky ny HCC na ny Fitsarana Avo Momba ny lalam-panorenana ny alatsinainy teo ny lalàna mifehy ny mpanohitra. Naverina nojerena izany ka nivoaka omaly ny fanapahan-kevitra farany. Voalaza tamin’izany fa ny fanoherana eo anivon’ny Antenimiera ihany no tarihin’ny lehiben’ny mpanohitra ofisialy. Afaka mifidy izay ho lehiben’ny mpanohitra mety aminy kosa ireo ivelany.

Nanao fitokonanana ireo mpiasan’ny Paositra Malagasy ny maraina teo, nitaky ny tokony hisian’ny fahaleovan-tenan’ny Paositra, indrindra ny lalàna mifehy azy ireo. Ankilany, nilaza ny eo anivon’ny minisitera fa noho ny fanavaozana ao amin’ny Paositra Malagasy no niteraka tsy fitovian-kevitra ka nahatonga ny fitokonana.

Mifantoka betsaka amin’ny fanarenana ny toekarem-pirenena sy ny sosialim-bahoaka ny Tetibolam-panjakana nasiam-panitsiana na ny LFR 2021. Ankoatry ny fanatsarana ny fampidiram-bolam-panjakana toy ny amin’ny alalan’ny fampidiran-ketra, hojerena manokana ny fitsirihana ny mpiasam-panjakana matotoa, izay mitarika fatiantoka goavana amin’ny fanjakana.

Zotra miisa 3 no hampitohy  an’ i Talatamaty , Amoronankona By Pass, izay mihazo ny Rocade d'Ivato Tsarasaotra sy Rocade D’Iarivo. Fiara vaovao manaraka ny teknolojia no hiasa amin’izany ary ny système billetique no hampiasaina raha ny fanazavana. Ny faran’ny volana Jolay izao no hanomboka ny fitrandrahana ny zotra mampitohy an’I Talatamaty amin’Ankorondrano. Fiara miisa 5 no hitrandraka izany.