Archives mensuelles: juin 2019

Nisy namaky ny Laapan’ny Tanànan’ Antananarivo Renivohitra omaly alina. Tao amin'ny vararana faha- 15 no nitrangan'izany, raha ny fanazavana avy amin'ireo mpiambina ny vavahady. Tsy fantatra mazava ny vokatr'ity tranga ity noho ny tsy fanomezan'ny tomponandraikitra eo anivon’ny kaomina Antananarivo Renivohitra vaovao na nilaza aza izy ireo fa hampanjaka ny mangarahara tanteraka andro vitsivitsy lasa izay.

Nisokatra tamin'ny fomba ofisialy nanomboka androany -6 jona ny fankalazana ny faha -59 taona niverenan'ny fahaleovantenan' i Madagasikara sy ny fetin'ny foloalindahy malagasy. Nanomboka androany ihany koa ny tokony hananganan-tsainan’ny tokantrano Malagasy tsirairay sainam-pirenena ho fanamarihana ireo fety roa sosona ireo.

Tsy mbola misy ny enti-manana entina hanontana rakibolana malagasy vaovao. Vokany, aman'aliny ireo voambolana malagasy no miandry izany. Mitohy raha ny fanazavana ny fikarohana voambolana. Amin'izao iray volan'ny teny malagasy izao, lohahevitra entina manamarika izany ny fifehezana ny teny malagasy entina mifehy ny teny vahiny.

Mavesatra amin’ny sarababem-bahoaka amin’ny ankapobeny ny saram-pitiliana raha toa ka autiste ny zaza iray na tsia. Fitiliana karazany 5 farafaha-keliny no atao ary maherin’ny 7 alina ariary avokoa ny sarany. Ilaina araka izany ny fiaraha-mientan’ny tomponandraikitra rehetra na miankina amin’ny fanjakana na tsia.

Taorian'ny fotoam-pivavahana ny maraina, nitohy tamin'ny fiaraha-misakafo ny fety, nentin'ny mpino silamo nanamarihana ny andro androany. Samy nanomana ny azy nizy ireo, isan'izany ireto tanora mivondrona amin'ny finoana silamo nanaovana fanadihadiana ireto. Fanadihadiana.

Mihoatra avo 3 heny amin'ny fetra farany azo leferina ny fahalotoan'ny tontolo iainana ateraky ny vovoka manify avy amin'ny fampiasana motera eto Andrenivohitra raha toa ka hatramin'ny 50 microgramme isaky ny metatra toratelo ny fenitra napetraky ny OMS. Mirongatra vokatr'io ny aretin'ny fitaovam- pisefoana ankehitriny .

Ny sehatry ny fampandrosoana, indrindra any amin’ny faritra Atsimo tahaka ny famatsian-drano sy ny fampivoarana ny maha-olona. Ireo no nivoitra nandritra ny dinika nandraisan’ny praiminisitra ny delegasiona avy amin’ny firenena mikambana ny maraina teo. Hatevenina ny ezaka hoataon’ny fanjakana hiadiana amin’ny fahantrana hoy ny praminisitra.

Mifarana anio ny famoahana ireo fironam-bokatra na (tendances des résultats) izay azo tamin'ny alalan'ireo PV scannés. 107 amin'ireo SRMV 119 manerana ny Nosy no efa nahatonga ny PV réel ety anivon'ny CENI foibe ary andrasana hatramin'ny anio alina ireo ambiny avy amin'ny SRMV 12 isa.

Nisy ny fihaonana tamin'ireo tomponandraikitra eo anivon'ny Otiv sy ny Filohan'ny Repoblikan'i Madagsikara ny maraina teo manoloana ny fahamana ny olana izay nampitaraina ireo mpikambana eo anivon'ny Otiv. Nanome fe-potoana hatramin'ny zoma ho avy izao ny filoha hamahan'izy ireo io olana io.

Taorian'ny fitsidihana natao omaly alina teto Antananarivo renivohitra, afa-po ireo tomponandraikita eo anivon'ny Tafika sy ny Polisim-pirenena ary nanamafy fa hitohy hatrany ny ezaka famerenana ny filaminana eto amintsika. Ny hahafahan'ny vahoaka miaina am-pilaminana, lavitry ny tebiteby no tanjona.