Archives mensuelles: janvier 2020

Toy ireo ministera maro samihafa, nanatanteraka ny fambolen-kazo tany amin'ny distrikan'Ankazobe ihany koa ny ministeran'ny Fanajariana ny tany ny toeram-ponenana ary ny asa vaventy sy ny ministeran'ny Fanabeazam-pirenena androany. Tonga maro ireo avy eo anivon'ny ministera nanatanteraka ny fambolen-kazo tamin'ity androany ity.

Hazo miisa 2 hetsy sy 1 Tapitrisa no novolena tany amin’ny distrikan’Ankazobe androany. Fotoana nanokafana tamin’ny fomba ofisialy ny taom-pambolen-kazo 2020 ary fotoana nanamarihana ihany koa ny faha herintaonan’ny fianianana nataon’ny Filohan’ny Repoblikan’i Madagasikara teny Mahamasina. Madagasikara maitso no tanjona hoy ny filoha Andry RAJOELINA.

Namoaka fanambarana niarahaba an’i Madagasikara tamin’ny fanokafana ny fotoam-pambolen-kazo i Etazonia, amin’ny alalan’ny Masoivoho monina sy miasa eto Madagasikara. Ny Governemanta amerikana, amin'ny alàlan'ny Sampandraharaha Amerikana ho an'ny Fampandrosoana Iraisam-pirenena (USAID), dia mamatsy vola mitentina 57 tapitrisa dolara amin'ny alàlan'ny tetikasa samihafa hanampiana an'i Madagasikara hiaro ny zava-manan'aina sy ny ala tsy manam-paharoa ao aminy.  

Ho fantatra ny fiafaran’ny volana febroary izao ny isa marin’ny mponina eto Madagasikara hoy ny Tale jeneralin’ny INSTAT. Ny RGPH 3 izay nahazoana mari-drefy sy antotan’isa maro ilaina eo amin’ny fampandrosoana ny firenena.

Taorian’ny fivorian’ny filankevi-pitantanana , voatendry ho tale jeneraly mpisolo toerana ny kaompaniam-pitaterana Air madagascar i Rasetarinera Hanitra. Toerana izay tazominy eo am-piandrasana ny fanendrena ny tale jeneraly vaovao. Na teo aza ny fiarahamiasa amin’I Air Austral, mbola misedra olana ny kaompania nasionaly.

Nitsidika ny asa fanorenana ny logement miisa 100 izay tontosain'ny SEIMAD teny Ankadikely Ilafy ny ministeran'ny fanajariana ny tany, ny toeram-ponenana ary ny asa vaventy androany. Tanjona ny hanatratrarana ny fanamby napetraky ny filoham-pirenena ny amin'ny fanomezana toeram-ponenana sahaza ny rehetra, hoy ny minisitra tompon'andraikitra.

Notanterahina androany ny « réception provisoire » ny lalana lot 4, izay misy ampahan-dalana miisa 3, izay mitôtaly 11,6 km. Voakasiky ny fanamboarana ny lalan’ny fiarakodia, ny lalan’ny mpandeha tongotra ary ireo fivoahan-drano.

Manameloka ny fihetsika nataon’ny filohan’ny Antenimirandoholona, Rivo RAKOTOVAO, izay niverina fanindroany teny amin’ny HCC, ireo mpikambana eo anivon’ny birao maharitra. Tsy tokony hafangaro hoy izy ireo ny fitondrana andrim-panjakana sy ny fitondrana antoko Politika.

Notokanana anio ny trano fianarana vaovao teny amin’ny EPP Andoharanofotsy taorian’ny ny asa fanatsarana izay niharahan’ny sehatra tsy miankina tamin’ny Ministeran’ny fanabeazam-pirenena sy ny fampianarana teknika ary ny fampiofanana arak’asa. Maro ireo vokatra azo amin’ny fiaraha-miasa amin’ny sehatra tsy miankina ho fampandrosoana ny fanabeazana raha ny nambaran’ny Minisitra tomponandraikitra.

Tontosa androany ny fifanaovan-tsoniam-pitantanana ho an'ireo aérodrome miisa 8 eto Madagasikara. Sehatra tsy miankina no hitantana ireo aérodrome ireo ao anatin'ny 5 taona azo havaoina, izay tafiditra amin'ny fanatsarana ny fifamezivezena sy ny famoaham-bokatra avy amin'ny faritra amin'ny alalan'ny fiaramanidina.