Archives mensuelles: janvier 2023

Mirongatra ny resaka halatra posy ao Toliara ao amin’izao fotoana izao. Androany maraina dia mpangalatra cyclo-pousse miisa 4 no tratehaky ny police avy eo anivon’ny commissariat de police Betania.

Amin’ny faramparan’ny volana Oktobra ho avy izao no hamoaka am-pahibemaso ny valin’ny fandihadiana nataony ny ONG Ivorary, mahakasika ny fahatanterahan’ireo fampanantenana nataon’ny Filoham-pirenena tamin’ny vahoaka Malagasy araka ny nambaran’ny Tale mpanatanteraka an’ity fikambanana tsy miankina ity androany. Hahafahana misintona ny sain’ny vahoaka mialohan’ny fifidianana izany raha ny fanazavany.

Tsy manaiky ny fanemorana ny fifidianana 2023 ny eo anivon’ny antoko RMDM na ny Rodoben'ny Mpanohitra ho an'ny Demokrasia eto Madagasikara raha ny nambarany mpitarika androany. Ankoatra izay, nanamafy ny tokony hanatsarana ny lalam-pifidianana ihany koa ny filoha mpitarika. Eo ihany koa ny fanavaozana indray ny lisitry ny mpifidy amin’ity volana janoary ity, hialana amin’ny korontana ara-politika mialohan’izao fiantrehana ny fifidianana amin’ity taona 2023 izao.

Dimy volana aty aorian'ny nahatratrarana ireo toerana sy ambina solika ary ireo fitaovana fikirakirana sy fanampohana solika teto Toamasina. Olona telo farafahakely no fantatra fa mihitsoka ao amin'ny Fonjan'Ambalatavoahangy hatramin'izao, raha toa ka ampolony ireo mpiasa irakiraka voarohirohy tamin'ity raharaha ity. Tsy mbola hita soritra ny valin'ny fanadihadiana izay nampanantenaina ny amin'ny hikarohana ireo ati-doha mikotrika izay tokony hampahafantarina ny vahoaka amin'ny maha raharaham-pirenena azy.

Lehilahy iray no saron’ny zandarimariam-pirenena nitondra rongony milanja 47kg teny Alasora ny alin’ny asabotsy lasa teo. Vokatry ny velapandrika ny alin’io ihany, olona 5 hafa no voasambotry ny zandary sy ny andrimasom-pokonoloana teny amin’ny kaominina Alasora ihany. 3 amin’ireo voasambotra no nikasa hanao kolikoly tamin’ny zandary ka nanolotra 4 tapitrisa ariary.

Tafiakatra 950 Ariary amin’izao fotoana ny kapoakam-bary eny an-tsena amin’izao fotoana. Fiakaram-bidy izay mampitaraina ny ankamaroan’ny Malagasy raha ny fanadihadiana natao.

Manana anjara lehibe amin’ny tamberimbidy ny vahoaka amin’ireo kaominina hisian’ny tetikasa fitrandrahana harena ankibon’ny tany eto Madagasikara hoy ny firaisamonim-pirenena. Mihantraika mivantana amin’ny fiainana andavan’andron’ireo mponina voakasiky ny tetikasa ny fitrandrahana ka antony tokony hanomezana ara-drariny ny tamberimbidy ho azy ireo, ho fampivoarana sy hanatsarana ny fiainana eny ifotony.

Azo sokajiana ho 3 lehibe ny asa miandry ny governoran’ny Banky Foiben’i Madagasikara vaovao hoy ny mpahay toekarena nanaovana fanadihadiana androany. Isan’ireny ny fijerena manokana ny fahamarinan-toeran’ny vidin-javatra fa ihany koa ny fampiroboroboana ny lafiny toekarena amin’ny maha tany andalam-pandrosoana an’i Madagasikara.

Tokony hanolotra vahaolana ho an’ireo tantsaha mpamokatra ny mpitondra fanjakana amin’izao fotoan’ny maitso ahitra izao, hoy ny mpiaro ny zon’ny mpanjifa. Ireo tantsaha izay lasa mividy lafo ny vokatra novokariny noho ny fisian’ireo mpijirika sy mpaka tombony tsy voaara-maso, indrindra eo amin’ny vidim-bary.

Niverina nahazo vahana indray rehefa niato tato ho ato ny famakiana ireo fiarakodia sy koadiaran-droa. Maro amin’ireo olon-dratsy manao manokana izay ankehitriny no mampiasa karazana fanalahidy mety amin’ny rehetra na « Clé Standard » ka mora amin’izy ireo ny fandrobana ny fiara raha ny fanadihadiana.