Archives mensuelles: octobre 2018

Na nisy aza ny famoahan’ny primatiora requisition milaza ny tokony hamoahana ireo angidimby miisa valo ny faran’ny herinandro teo, nilaza indray ny tale jeneralin’ny ACM fa mbola handrasana ny famenoana ireo antotan-taratasy avy amin’ilay kaompania an’habakabaka sky service vao hivoaka ny fahazoan-dalana hisidinan’ireo angidimby ireo eto Madagasikara.

Tontosa tany Sahanonoka Kaominina Andekaleka Disitrikan’i Brickaville tamin’ny Alakamisy faha-4 oktobra lasa teo ny fanajariana ny sahandriaka na ny « bassin versant ». Ity sahandriaka ao Sahanonoka ity dia isan’ireo sahandriaka mitoetra ambonin’ny barazin’Andekaleka, izay mamatsy rano ny milina mpamokatra herinaratry ny JIRAMA ao Andekaleka

Tsy ny antsasa-manilan’ireo kandida nilatsaka ho Filohampirenena akory no nanaiky nanao sonia ilay fifanarahana mifehy fitsipim-pitondran-tena mialoha, mandritra ary aorian'ny fifidianana. Omaly 7 oktobra no fepotoana farany napetraky ny CFM hahafahana manao sonia io fifanarahana io.

Tafakatra hatramin'ny 40 000 Ar ny saran-dalana ho an'ny zotram-pitaterana Antananarivo- Mahajanga amin'izao fotoana izao raha tokony tsy hihoatry ny 30 000 Ar izany araka ny voasoratra ao amin'ny bokinandraikitra na ny cahier de charge eny anivon'ny ATT. Milaza ho tsy mahafantatra ny zava-misy anefa ny tomponandraikitra rehefa nanontaniana.

Tsy tokony ho sakana ho an’ireo solombavambahoaka amin’ny famonjena ny fotoam-pivoriana ara-potoana faharoa ny fiatrehana ny fampielezan-kevitra ankehitriny raha ny nambaran’ny solombavambahoaka nanaovana fanadihadiana. Ankilany, sakana avy amin’ny governemanta teo aloha raha ny fanazavana azo ny tsy nandinihana sy nandaniana ny lalàna mifehy ny famotsiambola sy ny fananana azo tamin’ny tsy rariny.

Iray andro mialohan’ny fampielezan-kevitra, nanantanteraka fotoam-pivavahana teny amin’ny Gare Soarano androany ny Mapar sy ireo manohana ny kandidà Andry Rajoelina. Nitondrana am-bavaka ny firenena sy ny fifidianana ho hatrehiny ity fotoam-pivavahana ity. Niantso ny Malagasy rehetra izay nisoratra anarana hanao ny adidiny hifidy ny kandidà laharana faha 13, Andry Rajoelina nandritry ny fandraisam-pitenenany.

Fanombohan’ny fampielezankevitra, mampiasa ny tetika rehetra ny HVM amin’ny fampiasana ny fitaovam-panjakana , fa ihany koa ny fanaovana ho fitaovana ireo mpiasampanjakana . Averina aminao ato anatin’ny fanadihadiana ity ny voalazan’ny lalàna mikasika ny pitsopitsony rehetra momban’ny fifidianana. Misy ny sazy mifanaraka amin’izany ho an’ireo rehetra minia mandika ny lalàna.

Saika ho isan'andro no ahenoana trangana lozam-pifamoivoizana eto amintsika na an-drenivohitra na eny amin'ny lalam-pirenena. Tranga izay saika nahafatesana olona avokoa.

Ho hentitra ny faraha-maso ny entana miaraka amin'ireo taxibrousse, miala sy mihazo ny renivohitra hoy ny tomponandraikitra, hisorohana ny loza mety hiseho sy ny famoizana ain'olona. Ny lozam-pifamoivoizana izay nitombo taha tato ho ato noho ny tsy fitandremana.

Nilaza ho tsy mahalala ny fisian’ny fifanarahana hitrandrahan’ny sambo sinoa miisa 330 ny fari-dranomasina malagasy ny filoha teo aloha Hery RAJAONARIMAMPIANINA. Ny mpanolotsainany Hugues RATSIFERANA no nanao sonia io fifanarahana io. Tsy nisy nefa ankilany ny fakan-kevitra ny mpisehatra voakasika sy ny ministera tomponandraikitra. Fatiantoka goavana amin’ny ara-tontolo iainana sy ny toekarena andranomasina no aterak’ity fitrandrahana ity.