Archives quotidiennes: 26 novembre 2018

Nilaza ny tsy handray anjara amin'ny fikarakarana fifidianana intsony ny ankamaroan'ireo sefo Fokontany ao amin'ny faritra Androy noho ny tsindry sy ny ramatahora ataon'ny Solombavambahoaka Milavonjy Philobert. Ankoatr'izay, io solombavambahoaka io no mifehy ny CENI any an-toerana.

Nanolotra kits-scolaire ho an'ny mpianatra tamin'ny fokontany maro teto an-drenivohitra i Andry Rajoelina tamin'ity androany ity. Fanehom-pitiavana, fa ihany koa ho famporisihina ny ray aman-dreny ampiana-janaka no anton'izao fanomezana izao hoy Andry Rajoelina.

Any amin’ny Fitsarana Avo momba ny Lalàmpanorenana avokoa ankehitriny no mifantoka ny mason’ny Malagasy. Fitsarana izay endriky ny fiandrianam-pirenena sy hany fitsarana tokana araka ny Lalàmpanorenana afaka mitsara sy mamoaka vokatra ofisialy ny fifidianana Filohampirenena eto amin’ny tanin’ny Repoblikan’I Madagasikara. Hitovy amin’ny voka-pifidianana navoakan’ny CENI ve ny vokatra havoakan’ny HCC amin’ny Alarobia ho avy izao, ka hisy ny fifidianana Filohampirenena fihodinana faharoa? Hanao ahoana ny fifampiandanian’ireo samy kandidà raha hisy izany? Fanontaniana mbola ny ampitso avokoa no hamaly izany.

Niompana bebe kokoa tamin'ny hafatra ho an'ireo tanora Malagasy ny fivondronamben'ny eveka eto Madagasikara, indrindra taorian'ny JMJ andiany faha 9 izay notontosaina tao Mahajanga farany teo. Na izany aza, nanipy teny ho an'ny vahoaka Malagasy ihany koa izy ireo ary miantso ny rehetra ho tony sy hilamina.

Nafindra ireo mpampianatra tsy nanaiky ho HVM sy hanampy ny Solombavambahoaka MILAVONJY tamin'ny fampandaniana ny Kandida laharana faha 12 tao amin'ny Faritra Androy. Mitaraina ireo mpampianatra voakasik'izany ary nilaza fa tsy tokony hafangaro ny Politika sy ny fanabeazana.

6 andro katroka aty aorian’ny namoahan’ny CENI ny voka-pifidianana vonjimaika vao hitany fa nisy ny fahadisoana teo amin’ny tarehi-marika navoaka. Nandefa fanitsiana ireo tarehi-marika diso ireo ho an’ny mpanao gazety izy ireo alina. Vao maika mampitombo ny ahiahy napetrak’ireo kandidà sy fiarahamonim-pirenena izany ary indrindra ny fahamatoran’ity Vaomiera Mahaleotena Misahana ny fifidianana ity.

Fahadisoana tsy nahy no nitranga ka niteraka fahasamihafan’ny voka-pifidianana vojimaika ofisialy nivoka teo amin’ny tranonkalan’ny ceni sy izay nambaran’izy ireo. Io no fanazavana nentin’ny vaomiera mahaleo tena misahana ny fifidianana izay nilaza handray fepetra. Izy ireo izay niatrika fivoriana tsy azo natrehina teny Nanisana.