Archives mensuelles: mars 2019

Mihatsara ny naoty azon'i Madagasikara eo amin'ny "indice de démocratie" mihoatra ireo firenena 167 manerana izao tontolo izao. Efa tsara ny vokatra saingy azo atao ny mandroso hatrany, hoy ireo mpisehatra politika.

Tsy mifanalavitra amin’ny fampiasaina loharanon’angovo sy akora fandrehitra hafa ny fandanian’ny tokantrano mampiasa harina fandrehitra. Manodidina ny 2 arivo Ariary isam-bola ny elanelan’ny vola mivoaka amin’ny tokantrano 2 mampiasa akora fandrehitra samy hafa raha ny fanadihadiana.

Handraisan'ny eo anivon'ny minisiteran'ny serasera sy ny kolontsaina fepetra avokoa ireo haino aman-jery tsy manara-dalàna araka ny nambaran'ny minisitra Lalatiana Rakotondrazafy androany. Hisy mialohan'izay raha ny fanazavana ny fanomezana fe-potoana hahafahan'ireo tompona haino aman-jery voakasika, hampanara-dalàna ny atonta-taratasiny.

Ny fari-pifidianan’Ambatondrazaka sy Mahajanga Voalohany no maro indrindra ireo kandidà nirotsaka ho fidiana Solombavambahoaka. Mahatratra 19 izany ho an’Ambatondrazaka ary 15 kosa ho an’i Mahajanga Voalohany.

Fanokafana ny fotoam-pilalaovana sport auto miaraka amin’ny Club TMF Rallye . Tontosaina ny faran’ny herinandro izao ny andiany faharoa amin’ny Slalom Wynn’s eny Ivato.

Taratasy firotsahana ho kandidà Solombavambahaoaka miisa 803 tamin’ireo 862 voaray teny amin’ny OVEC 119 manerana ny Nosy no nambaran’ny CENI fa azo raisina androany teny Nanisana.

Nampiatoana nandritra ny fotoana tsy voafetra ny fandraisana mpiasa tsy raikitra na ny ECD sy ny EFA. Tsy hisy intsony manombok’izao ny fandrasiana ho mpiasam-panjakana ivelan’ny fifaninana raha ny fanazavana azo teo anivon’ny minisiteran’ny asam-panjakana.

Manoloana ny olana amin'ny famatsiana rano vokarin'ny orinasa Jirama eto Antananarivo sy ny manodidina, nanambara tamin'ity androany ity ny tomponandraikitra eo anivon'ny orinasa fa afaka enim-bolana ny vahaolana haingana indrindra. Ny fahanteran'ny fitaovana, ny fisian'ny gaboraraka no voalaza fa antony mahatonga ny fahatapahan'ny rano.

Olona 4 no mbola karohana ankehitriny manoloana ny raharaha famarotana ny zaridainan'Antaninarenina sy ny CEG Analamahitsy, araka ny vaovao teo anivon'ny zandarimariam-pirenena io hariva io. Mbola anatin'ny fitsaboana ilay filohan'ny filan-kevitra monisipaly amin'izao fotoana izao , raha ny vaovao voaray hatrany. Ity farany izay voarohirohy amin'ity raharaha ity.

Tsy voatery hametra-pialàna ny minisitra kandidà ho solombavambahoaka. Ny tovana ao amin’ny lalàna 2018-008 no mamaritra izany, araka ny nambaran’ny mpahay lalàna nanaovana fandihadiana Fanampim-panazavana.