Archives mensuelles: février 2019

Nolavina ny "demande de suspension exécution de jugement" momba ny tanim-panjakana eo Antaninarenina. Io no vokatry ny fitsarana androany. Vaovao izay andrasan'ny be sy ny maro amin'ny tany misy ny vakoka ara-tantara sy ara-kolontsaina an' Antaninarenina.

Olona miisa 11 ao anatin'ny tambazotra mpanao Kidnapping eto amintsika no saron'ny mpitandro filaminana. Niaiky ny heloka vitany ireo taorian'ny fanadihadiana sy ny famotorana natao. Fantatra ihany koa ny toerana fametrahan'izy ireo ireo olona alaina an-keriny sy ny fomba fiasan'ireo jiolahy.

Iray volana androany ny fianianana nataon'ny filohampirenena Andry Rajoelina teny Mahamasina. Fotoana nandraisany tamin'ny fomba ofisialy ny andraikitra maha filohampirenena azy. Ambetin-teniny tamin'izany ny hoe "asa ary asa avy hatrany". Efa maro ny zavatra vita sy niarahan'ny rehetra nahita nandritra izay fotoana izay.

Faheno matetika eny anivon'ny fiarahamonina sy ny haino aman-jery tato ho ato ny filazana olona very. Io indray araka izany no nanontanian'ny Agence Capsule, izay miara-miasa amin'ny KOLO TV , ny hevitry ny olontsotra miisa 400 izay feno 18 taona mihoatra. Ato anatin'ity fanadihadiana ity no hanarahanao ny hevitr'ireo olontsotra ireo manoloana izany.

Sazy miatra an-tranomaizina herintaona sy lamandy 5 tapitrisa ariary. Izay ny didim-pitsarana nivoaka androany mikasika ny raharaha Hugues Ratsiferana. Etsy ankilany, mitohy ihany koa ny raharaha Mbola Rajaonah. Raha ny fanadihadiana natao, re fa namerina ny fiaran’ny fiadidian’ny repoblika izay niniany notazomina, ity farany.

Trano hazo miisa 18 kilan'ny afo teny amin'ny fokontany Anosibe Andrefana II ny maraina teo. Ankizy ampirehatra afo no niadohan'izany raha ny fanazavan'ny mponina.

Misedra olana ankehitriny ireo toerana fampianarana familiana fiarakodia nohon'ny tsy fisian'ny fahazoan-dalana hamily fiarakodia biometrika na ny permis de conduire biometrique. Tsy misy ny famoahana ny taratasy fahazoan-dalana mamily fiarakodia hatreto. Tokony ho hisy ny vahaolana vonjy maika hoy ireo mpianatra.

Nohatsaraina ny fomba fiasa ao amin'ny famohana sy fampidirana entana ao amin'ny seranan-tsambon'ny Toamasina, indrindra ny ao amin'ny Marchandises Conventionnelles. Hialana amin'ny fitarainan'ireo mpanafatra sy mpanondrana entana no tanjona amin'izany raha ny fanazavana.

Manano sarotra ny fikarohana ireo gadra nitsoaka tao amin'ny fonjan'i Tsiroanomandidy ny Sabotsy lasa teo hoy ny eo anivon'ny zandarimaria, noho ny tsy fananan'ny fonja ny sarin'ireo tafatsoaka. 2 hatramin'ireo no voasambotra raha ny fanazavana.

Hiverina eny anivon’ny fokontany ny lisi-pifidianana ny faha-28 ny volana ho avy izao, aorian’ny fandalovany eo anivon’ny vaomiera misahana ny fifidianana eo anivon’ny distrika. Manana 20 andro indray manomboka eo ny olompirenena hanamarina ny anarany anatin’ny lisitra vaovao ampiasaina amin’ny fifidianana Solombavambahoaka.