Archives mensuelles: janvier 2021

Zontosa androany ny fankalazana ny faha-100 taona ny fampiofanana eny anivon’ny seminera zandriny ambohipo. Efa nananika 230 ankehitriny ny Mopera dioseziana malagasy nivoaka teo anivon’ity seminera ity ka maro ny manao ny asa fanompoana hatrany ivelany. Misy ny sivana takiana hirosoana ho pretra saingy isany takiana ny fanoloran-tena araka ny fanazavana.

Tohin’ny raharaha fanondranana volamena milanja 73,5 kilao an-tsokosoko. Olona 8 no naiditra am-ponja vonjimaika raha ny fampitam-baovao navoakan’ny minisiteran’ny fitsarana tao amin’ny tambazotran-tserasera.

10 janoary, andro maneran-tany ho an’ny tantara an-tsary « les aventures de Tintin ». Maro amin’ireo mpanao asa tanana ankehitriny  no mampiasa ity tantara an-tsary ity ho fitaovana entina manintona ireo mpanjifa eto an-toerana sy any Ivelany, amin’ny alalan’ireo karazana sary sikotra sy « marqueterie » vita amin’ireo kazaran-kazo eto Madagasikara.

Mikatso ny tsenan’ny voninkazo ankehitriny. Mitombo ankilany ny masokarenan’ny mpivarotra amin’ny fikarakarana azy manoloana ny tsy fisian’ny rotsak’orana. Isan’izany ny vola mivoaka amin’ny fanondrahana. Izay indrindra no antony hampihenan’ny mpivarotra ny vidin’ny voninkazo hisintonana ny mpanjifa.

Fotoana fiatombohan’ny fivokaran’ny paoma. Any Antsirabe, hatreto, ratsy noho ny taona lasa ny vokatra tamin’ity taona ity. Anton’izay ny tsy fahampian’ny rotsak’orana.

Tafiakatra 11 ireo atao famotorana amin’ny raharaha fanondranana volamena 73,5Kg tratra tany Afrika Atsimo. Androany nisy ny fivorian’ireo minisitera voakasik’ity raharaha ity teny amin’ny minisiteran’ny raharaham-bahiny, ary an-dalana ny fifampidihihina amin’ny fampodiana ireo volamena sy ireo olona 3 voatazona any Afrika Atsimo.

Nisy ny fihaonana teo amin'ny solontenan'ireo mpianatra eo anivon'ny Ens sy ny minisitera tomponandraikitra androany manoloana ny fitakian'ireo mpianatra. Tsy mbola nisy ny hevitra tapaka nandritra izany ka nanohy ny hetsika ireo mpianatry ny Ens. Nihetsika nanampy azy ireo ihany koa ny mpianatra ao Antsiranana androany.

Toerana 10 no azon’ny lisitra kandidà avy amin’ny IRMAR na ny Isika rehetra miaraka amin’i Andry Rajoelina eny anivon’ny Antenimieran-doholona. 2 ho an’ny Antoko Malagasy Miara-Miainga. Izay raha fehezina ny vokatra ofisialy navoakan’ny Fitsarana avo momba ny Lalàmpanorenena mahakasika ny fidianana Loholona ny 11 desambra lasa teo.

Vonona ny hifanohana amin’ny fahefana mpanatanteraka hisian’ny fampandrosoana marina ny firenena ny Loholon’i Madagasikara vaovao. Ankoatran’ny fandinihana sy ny famolavolana lalàna,  ho jerena manokana ny lafiny fiahiana  ny vondrom-bahoaka itsinjaram-pahefana hisian’ny tena fampandrosoana marina araka ny fanazavana.

Manomboka ny asa fanamboarana ny lalana miainga eo amin’ny kion-dalan’Ankadimbahoaka mihazo an’Anosizato ankehitriny raha ny nambaran’ny teo anivon’ny minisiteran’ny fanajariana ny tany sy ny asa vaventy. Haharitra iray volana ny fanatanetrahina ny asa ary misy ny fandaminana napetraka  amin’ny fandrindrana ny fifamoivozana eny an-toerana mandritra izany.